13 June 2010

கராத்தே கிட்



அசராம அடிப்பதுதான் ஜாக்கிசான் ஸ்டைல். கராத்தே கிட் படத்தில் அசராமல் நடித்திருக்கிறார் ஜாக்கி! கடைசியாக வெளியான போலீஸ் ஸ்டோரியிலேயே அழுது புரண்டிருந்தாலும்.. கராத்தே கிட்டில் அமைதியாக ஆர்பாட்டமில்லாமல் நடித்திருக்கிறார். அமைதியான சீனர்களுக்கேயான கிழட்டு நடை! புன்னைகையில்லாத அமைதியான முகபாவம்.. இத்தனைவருடமாக ஜாக்கியை ஹாலிவுட்டும் சீனர்களும் விரட்டி விரட்டி சண்டையே போட வைத்துவிட்டனர். இந்த படத்தில் ஒரே ஒரு சண்டைதான் அதுவும் மிகமிக மிருதுவான வன்முறையில்லாத சண்டை!

ஹாலிவுட் நடிகர் வில்ஸ்மித்தின் மகன் ஜேடன் ஸ்மித் ஹீரோவாக அறிமுகமாகியிருக்கிறார். (அங்கேயும் வாரிசுகள் தொல்லைதானா!.. தந்தை மகனுக்காற்றும் உதவி!) சின்ன பையன்தான் ஆனால் சிறுத்தைக்குட்டி!. அம்மாவிடம் நாம ஊருக்கே போயிரலாம்மா! என்று அழும் போதும்.. கிளைமாக்ஸில் உடைந்த காலோடு சண்டையிடும் போதும் உழைப்பு தெரிகிறது. படத்தின் நாயகனின் அம்மாவாக வரும் தாராஜி ஹன்சன். சில காட்சிகளிலேயே தோன்றினாலும் கவர்கிறார்.

படம் முழுக்க சீனாவிலேயே படமாக்கப்பட்டிருந்தாலும் , கம்யூனிச சீனாவிற்கு எதிராக எடுக்கப்பட்டதோ என்று நினைக்கவைக்கிறது படம் சொல்லும் செய்தி மற்றும் அதன் அரசியல்! பழமைவாதியான ஜாக்கி குங்பூ எனும் ஆயுதத்தை சமாதானத்திற்கான கலையாகவும், தற்கால குருவான வில்லன் குங்பூ எதிரிகளை சாகும்வரை அழிக்கவும் பயன்படுத்துவாக சித்தரிக்கப்படுகிறது. சீனர்களை அமெரிக்க நாட்டின் கருப்பின சிறுவன் தோற்கடிக்கிறான்! இப்படி படம் முழுக்க நிறைய சின்ன சின்ன அரசியல் இருந்தாலும்.. படத்தை தயாரித்திருப்பது ஒரு அமெரிக்க நாட்டின் பிரஜை! அதனால் அதற்கு மேல் எதையும் எதிர்பார்க்க முடியாது! படம் முழுக்க முழுக்க ஒரு மாதிரி அழுக்காகவே எடுக்கப்பட்டுள்ளதும் சீன நகரங்களை நெருக்கடியாகவும் சீனர்களை வெறிபிடித்தவர்களாகவும் காட்டுவது நெருடல்.

குழந்தைகளுக்கான படமாக இருந்தாலும்.. படம் முழுக்க வன்முறை நிறைந்திருக்கிறது. தியேட்டரில் நிறைய குட்டீஸ்களைக் காண முடிந்தது. என்ன செய்ய? வேறு வழியில்லை, நம்மூர் சுறாக்களுக்கும் சிங்கத்துக்கும் குட்டிப்பிசாசுகளுக்கும் இந்த வன்முறைகள் குறைவுதான். சொல்லப்போனால் குழந்தைகள் மனதில் தைரியத்தை விதைக்கலாம். சண்டைக்காட்சிகள் படமாக்கப்பட்ட விதமும் , குங்பூ பயிற்சிக்காக ஜாக்கி அந்த சிறுவனை அழைத்துச் செல்லும் மலைகள் நிறைய புத்தக்கோயில்களும் பிரமிப்பு!

பயிற்சிக்காக ஆர்வத்தோடு வருகிற சிறுவனை விடாமல் அவனுடைய சட்டையை கழட்டி மாட்ட செய்வது.. அதைப்பற்றி தியேட்டரிலேயே பாருங்கள்.. ஒரு குட்டி ஜென் கதை பார்த்த திருப்தியை அளிக்கிறது கராத்தேகிட் திரைப்படம்! படம் பார்த்து முடிக்கும் போது குஷியான மூட் மனதிற்குள் நிரம்பி விடுகிறது. ஜாக்கிசானின் ரசிகர்களுக்கு ஏமாற்றமாக இருந்தாலும் ஜேடன் ஸ்மித் அந்த குறையை தன்னுடைய அபாரமான நடிப்பால் போக்குகிறார்.

படத்தில் மிக முக்கியமாக குறிப்பிட வேண்டிய ஒன்று டப்பிங்! சிம்பிள் மற்றும் பளிச் வசனங்கள். சில வசனங்களுக்கு தியேட்டரில் விசில் பறக்கிறது. முடிந்தவரைக்கும் படத்தை தமிழ் டப்பிங்கில் பார்ப்பது உசிதம்!

1984களில் வெளியான கராத்தே கிட் என்னும் படத்தின் ரீமேக் இது. இந்த படத்தை வில் ஸ்மித் தயாரித்துள்ளார். ஜாலியாக இரண்டு மணிநேரம் பார்க்க கூடிய நல்ல விறுவிறு சுருசுரு குங்பூ படம்.

***********

11 comments:

ஊர்சுற்றி said...

வாவ். இந்த 'The Pursuit of Happyness' படத்துல நடிச்சிருந்த அந்த பொடிப்பயலா!!!

King Viswa said...

என்னது குங்க்பூ படமா? நான்கூட ஏதோ குஷ்பூ படம் என்று நினைத்து விட்டேன்.

ஆதிமூலகிருஷ்ணன் said...

இப்பிடித்தான் விமர்சனம் எழுதறதா? என்னப்பா நீயி.? ஒழுங்கா ஒரு விமர்சனம் எழுத துப்பில்ல.! :-))

தனுசுராசி said...

நேத்து தான் இந்த படம் பாத்தேன். கண்டிப்பா பாக்க வேண்டிய படம் தான். ஆனா என்ன இங்க தமிழ்ல பாக்குற வாய்ப்பு கெடைக்கல.

படத்தில் எனக்கு ரொம்ப புடிச்சது பாறை உச்சியில் ஒரு கரு நாகத்தின் முன் ஒரு அம்மா பயிற்ச்சி செஞ்சிக்கிட்டு இருப்பாங்க. அந்த காட்சி என்னை மிகவும் கவர்ந்தது. அதே உக்தியை பயன் படுத்தி தான் கடைசியில் எதிரியை அடிப்பார் நாயகன்.

தனுசுராசி said...

இந்த படத்தை தமிழில் டாக்டர் விஜையயும் அவருடைய பைய்யனையும் நடிக்க வச்சா எப்புடி இருக்குமுன்னு என்னோட நண்பர் ஒருத்தர் கேள்வி கேட்டார்... நான் நெனச்சுப் பாத்து அப்புடியே ஷாக் ஆயிட்டேன்.

♠ ராஜு ♠ said...

\\1984களில்\\

:-)

Prasanna Rajan said...

//
பயிற்சிக்காக ஆர்வத்தோடு வருகிற சிறுவனை விடாமல் அவனுடைய சட்டையை கழட்டி மாட்ட செய்வது.. அதைப்பற்றி தியேட்டரிலேயே பாருங்கள்.. ஒரு குட்டி ஜென் கதை பார்த்த திருப்தியை அளிக்கிறது கராத்தேகிட் திரைப்படம்!
//

அது ஒரு ஜென் கதை தான். இதே போல் 2012 படத்தில் ‘கோப்பை நிறைய தேநீர்’ ஜென் கதையும் வரும்.

வேற என்ன செய்ய, ஹாலிவுட்காரர்களுக்கு எழுத சரக்கு வேண்டுமே...

raashidsite said...

இந்த மனுஷன் ஜாக்கிசான் இந்த வயசிலயும் எப்டிதான் உடம்ப இப்படி மெயிண்டன் பண்றாறோ ? அன்னக்கி பாத்த மாதிரி அப்படியே இருக்கார் !! முகத்தில சுருக்கம் தான் வயசாயிடிச்சுன்னு சொல்லுது !! சரி அத விடுங்க! திருட்டு விசிடி எங்க கிடைக்கும் ? அத சொல்லுங்க ?

ஆர்.கே.சதீஷ்குமார் said...

ரீமேக் எப்படி இருக்க வேண்டும் என்பதற்க்கு உதாரண படம்

Sriram Srinivasan said...

நல்ல படம் போலிருகிறது
இந்த வாரம் பார்த்து விட வேண்டியதுதான்

-ஸ்ரீராம்

Anonymous said...

Please give your views about Vedam-telugu film.Certainly it doesnt belong to telugu cine industry.

There was an error in this gadget