17 December 2013

மாமிகள் இருவர்





பொதிகை தொலைகாட்சியில் ஏதோ நிகழ்ச்சி. இரண்டு மாமிகள் ஒரு டேபிளுக்கு முன்னால், விலையுயர்ந்த பட்டுப்புடவை கழுத்து நிறைய நகைகளோடு பேசிக்கொண்டிருந்தனர்.

அவர்களுக்கு முன்னால் மிக்ஸி, வடைசட்டி, அடுப்பு, காய்கறிகள் பழங்கள் வைக்கப்பட்டிருந்தன. அதில் ஒரு மாமி சமைப்பவர் என்பதை அவர் கையிலிருந்த நீண்ட கரண்டியே உணர்த்துவதாக இருந்தது. இன்னொரு மாமி நிறைய மேக்அப் போட்டுக்கொண்டு பக்கத்தில் நின்றபடி அடுப்பு சட்டியை எட்டிபார்த்தபடி பேசிக்கொண்டேயிருப்பதை வைத்து அவர்தான் நிகழ்ச்சி தொகுப்பாளர் என்பதை புரிந்துகொள்ளவும் முடிந்தது. பொதிகை தொலைகாட்சியும் ஏர்இந்தியா போலவே வயதான தாத்தா பாட்டிகளின் சொர்க்கமாக திகழ்வது ஆச்சர்யமானதுதான்.

பொதிகை தொலைகாட்சியில் இரண்டு பேர் பேசிக்கொண்டிருந்தால் யார் நிகழ்ச்சி தொகுப்பாளர் என்பதை கண்டுபிடிப்பதற்குள் போதும் போதும் என்றாகிவிடுகிறது!

இரண்டு மாமிகளும் நிறைய பழங்களை அடுக்கி வைத்து ஏதோ செய்துகொண்டிருந்ததை பார்க்கவும் எனக்கு ஆர்வமாகி தொடர்ந்து பார்க்க ஆரம்பித்தேன். வீட்டிலேயே ஃப்ரூட் சாலட் செய்து சாப்பிட எனக்கு எப்போதும் பிடிக்கும். இணையத்தில் விதவிதமான ஃப்ரூட் சாலட் ரெசிப்பிகள் பார்த்து அவ்வப்போது நேரம் கிடைக்கும்போது செய்து பார்ப்பதுண்டு.

பெரிய மாமி ஒரு அன்னாசி பழத்தை எடுத்து சின்ன சின்ன துண்டுகளாக நறுக்கி மிக்ஸியில் போட்டு அரைத்து ஒரு கப்பில் எடுத்து வைத்துக்கொண்டார். அருகிலிருந்து டிவிமாமி ஓ இதை அரைச்சு இப்படி வச்சிக்கணுமா என்றார்.

பிறகு ஒருவாழைபழத்தை எடுத்து அதையும் துண்டுதுண்டுகளாக நறுக்கி அதையும் ஒரு கப்பில் வைத்துக்கொண்டார்.மீண்டும் அதே மாமி அதே வசனம். ஓ இதை அரைச்சு இப்படி வச்சிக்கணுமா?

ஏதோ ஃப்ரூட் சாலட் அல்வா மாதிரி ஏதோ செய்யப்போகிறார் என்று யூகித்தேன். ஆனால் அடுத்து ஒரு வெள்ளரிக்காயை எடுத்து அதையும்... துண்டுதுண்டாக நறுக்கி.. அதற்கு பிறகு தக்காளி... அதற்கு பிறகு பப்பாளி.. மாம்பழம்... இப்படியே பத்துக்கும் அதிகமான பழங்கள்.. பிறகு பீட்ருட்,கேரட்,வெள்ளரி என காய்கறிகள். பிறகு ஊறவைத்த பாசிப்பயறு அதையும் அரைத்து ஒருகப். நடுநடுவே...ஓ இதை அரைச்சுட்டு இப்படி வச்சிக்கணுமாக்களும் தொடர்ந்தது.

அந்த மாமி பழங்களை தருவதும் இந்த மாமி வெட்டிப்போடுவதுமாக கப்புகள் ஒருபக்கம் நிறைந்து கொண்டிருந்தன... அடுப்பில் ரொம்ப நேரமாக கொதித்துக்கொண்டிருந்த என்னமோவை எடுத்து கீழே வைத்தனர். அதில் என்ன இருக்கும்.. ஒருவேளை அதுதான் இந்த சமையலில் சீக்ரெட் வெப்பனோ என்றெல்லாம் நினைத்தேன்.

''இப்ப பாருங்க தண்ணீ நல்லா சூடாகிடுச்சு'' என்றார் மாமி! அதற்கு ஆமாம் என்று எட்டிப்பார்த்து பதில் சொன்னார் டிவிமாமி.

அந்த தண்ணீரில் நன்னாரி வேர்களை தூக்கிப்போட்டு அந்த நீரை ஊறவைத்து வடிக்கட்டி வைத்துக்கொண்டு, அதை எல்லா கப்பிலும் கொஞ்சகொஞ்சம் ஊற்றினார் மாமி. வாசனைக்காக இருக்கும் என நினைத்துக்கொண்டேன்.

இப்போது தக்காளி ஜூஸை எடுத்து வெள்ளரியில் கலக்க ஆரம்பித்தார். அதுபோல வாழைப்பழ கலவையை பப்பாளியிலும், இப்படியாக ஒவ்வொரு ஜூஸையும் இன்னொன்றோடு கலக்கவும் தொடங்கினார்.

எல்லா கலவைகளையும் கலக்கி முடித்தபிறகு,... பத்துப்ளஸ் கப்புகள் இப்போது பாதியாக குறைந்திருந்தன. உப்பு இல்லை... சக்கரை இல்லை.. ஏதோ இயற்கை உணவு போல.. என்று நினைத்தேன்.

''இந்த கலவைகளை அடுத்து என்ன பண்ணனும்'' என்று நம் மனதில் எழுந்த அதே கேள்வியையே அந்த டிவிமாமியும் கேட்டார்.

''இதோ இந்த வாழைப்பழ பேக்கை திங்கள் கிழமை, பப்பாளிபேக்கை செவ்வாய்க்கிழமை.. இந்த பீட்ரூட் பேக்கை புதன்கிழமைனு ஏழு நாள் ஏழு பேக் யூஸ் பண்ணினா முகம் நல்லா ஜம்முனு ஜொலிக்கும்.. முகத்துல இருக்கிற பிம்பிள்ஸ், கறும்புள்ளிகள், முகசுறுக்கம் எல்லாம் மறைஞ்சி பளிச்னு ஆகிடுவீங்க'' என்றார் பெரிய மாமி. ஓ... இதை எப்படி பயன்படுத்தணும் என்று தொடர்ந்து டிவிமாமி கேட்க..

''ரொம்ப சுலபம் நம்ம நன்னாரி தண்ணியை முகத்தில் தேய்த்து கழுவிட்டு.. இந்த பழக்கலவைகளை ஃபேஸ்ல அப்ளை பண்ணிட்டு கழுவினா ரொம்ப அழகா ஆகிடுவீங்க'' என்றார் பெரிய மாமி.

இதுவரைக்கும் எனக்கு கோபம் கொஞ்சமாகத்தான் வந்திருந்தது. ஆனால் டிவிமாமி அதற்கு பிறகு கேட்டதுதான் ''ஓ இதுதான் உங்க அழகின் ரகசியமா?'' என்றார்.

அந்த அடக்கமான மாமியோ.. ''ஆமா.. எங்க ஆத்துக்காரர் எப்பயும் அப்படிதான் ஷோல்வார். ஆனா மனசை எப்பவும் சந்தோஷமா வச்சுண்டா இதெல்லாம் எதுமே தேவயில்லை'' என்று சொல்லிக்கொண்டிருக்கும்போதே நிகழ்ச்சி நிறுத்தப்பட்டது.

என்ன அவசரமோ என்னமோ திடீரென வேறெதோ ஒளிபரப்பு மாறுவதாக அறிவிப்பு வந்தது. ரொம்ப வயசான ஆனால் நிறைய மேக்கப்போடு சில மலையாள மாமிகள் அந்தக்கால அட்டைபெட்டி ஸ்டுடீயோவில் நின்று ஏதோ பாரம்பரிய நடனம் ஆட ஆரம்பித்துவிட்டிருந்தனர். பொதிகை சேனல் மாறவேயில்லை.

19 comments:

எழுத்தாளர் புதின் said...

நல்ல காமெடியான பதிவு.
நானும் பொதிகையில் இதை அனுபவித்துள்ளேன்.
முடிந்தால் என் தளத்திற்கு வாருங்கள்.
www.pimbam.com

எழுத்தாளர் புதின் said...

நல்ல காமெடியான பதிவு.
நானும் பொதிகையில் இதை அனுபவித்துள்ளேன்.
முடிந்தால் என் தளத்திற்கு வாருங்கள்.
www.pimbam.com

saidaijagan said...

But still "Podhigai" Rocks.

Anonymous said...

ஒருநாள் ஞாயிறன்று நடுராத்திரி ஏதோ சுதந்திரப்போராட்டகால கதை கொண்ட தொடர் நாடகம் ஒளிபரப்பினார்கள். என்ன பெயர், அடுத்த பகுது எப்போது என்று ஒன்றும் கண்டுபிடிக்க முடியவில்லை. அதில் காந்திய வழியில் சமூக சேவையில் ஈடுபடும் பெண்ணாக வந்தவர் ஆன்ட்ரியா! (ஜெரிமியா தான்). அவரது கணவராக வந்தவரும் திரைப்படங்களில் நடிப்பவர் என்று நினைக்கிறேன். ஆண்ட்ரியா கதாபாத்திரத்தின் பெயர் ஜானகி. யாராவது அந்தத் தொடர் பெயர் கண்டுபிடித்துச் சொன்னால்... யுடியூபில் தேடிப்பார்த்துக்கொள்வேன்!

சரவணன்

சுரேஷ் said...

செம்ம பாஸ் ... இதே மாதிரி தெனிக்கும் ராத்திரி சந்தீகத்த பாடி நம்ம சங்க அருபானுங்க பாருங்க .... மஹா கொடுமை ...

Muraleedharan U said...

All DD channel punctual on timing, The final song ,comedy , highlight, climax of movie will be stopped all sudden. the end part will be the good part , but they don't like to watch

ராஜி said...

ஃபேஸ்புக், ட்விட்டர், எஸ்.எம்.எஸ்ன்னு மத்த சேனல்கள்லாம் கல்க்கிட்டு இருக்கும்போது பொதிகைல இன்னும் அதே எதிரொலி நிகழ்ச்சி வருது. யார் லெட்டர் எழுதுறாங்கன்னுதான் தெரியலை.

muthusiva said...

'பொதிகைல நிகழ்ச்சி தொகுபாளர் யாருனு கண்டுபிடிக்கறததுக்குள்ள போதும் போதும்னு ஆகுது'-நானும் பல முறை ப்ர்யத்தன பட்டு தோல்வி அடைந்து இருக்கிறேன்:)

Gopalakrishnan Saroma said...

//இதுவரைக்கும் எனக்கு கோபம் கொஞ்சமாகத்தான் வந்திருந்தது. ஆனால் டிவிமாமி அதற்கு பிறகு கேட்டதுதான் ''ஓ இதுதான் உங்க அழகின் ரகசியமா?'' என்றார்.//சிரிச்சி மாளல ....சூப்பர் அதிஷா

கோவி.கண்ணன் said...

:)

அதிஷா பஞ்ச்.....!

scenecreator said...

ஒ இதை இப்படி கலாய்க்கலாமா ?

VISA said...

:)

Uma said...

இதே நிகழ்ச்சியை நானும் கொஞ்ச நேரம் பார்த்தேன், பொதிகை மாறவில்லைதான் எனினும் ஏதாவது டிப்ரெஷன், டென்ஷன் ஆக இருக்கும்போது பொதிகையை ஆன் பண்ணி, மனதுக்குள் ஜாலி கமெண்ட்ரி கொடுத்துக்கொண்டே பாருங்கள் சிரித்து சிரித்து மனம் இலேசாகிவிடும்.

Anonymous said...

LOL, Athisa,

Anonymous said...

பொதிகை டிவி இந்த நிலையில் இருக்க காரணமே மாமன்களும் மாமிகளும் தான். இவர்கள் ஆதிக்கத்தால் தான் பொதிகை சீர்கெட்டுக் கிடக்கிறது.


RSV

Anonymous said...

yellarum anubava patathai apadiye wordingla kondu vanthuteenga...nice ....

Umesh Srinivasan said...

80 களில் இவர்களின் அலப்பறை தாங்க முடியாது.நல்ல வேளை தனியார் தொலைகாட்சிகள் வந்து நம்மைக் காப்பாற்றின.

Raashid Ahamed said...

இதை படிக்கிறப்போ எனக்கு என்னா ஞாபகம் வருதுன்னா ! ஒரு படத்துல விவேக் “சமையல் எக்ஸ்பர்ட் சரவணன்” அப்படின்னு வந்து மும்முரமா ஏதோ செய்வார். கடைசீல இது சமையல் இல்ல சட்டியில் உள்ள ஓட்டையை அடைக்க கோந்து பண்ணுனேன். இந்த சட்டியை வச்சி வெந்நீர் எப்படி போடுவதுன்னு சொல்லி குடுக்க போறேன் அப்படீன்னு சொல்வார். அருமையா ரசிச்சி சிரிச்ச நகைச்சுவை அது போலதான் இருக்கு ! சாப்பிடுற அயிட்டத்தை மூஞ்சியில தேச்சா ! நல்லா வருது வாயில !!!

யோகன் பாரிஸ்(Johan-Paris) said...

இதெல்லாம் இப்போ ஒருவகை மன வியாதி போல்.
இவர்களுக்கு 60 வயதிருக்கும், பேரப்பிள்ளை கண்டிருப்பார்கள்.
முகச் சுருக்கம் இயல்பானதென்பது அறியா....அறிவாளிகள் இவர்கள்.
உங்கள் எழுத்தில் நக்கல் தெறிக்கிறது.

There was an error in this gadget